The Medical Family:
مجموعة نصائح لابد كل طبيب سواء طالب او مقيم لازم يعرفهم 👇❤️
١- من تجي للكول البس ملابس مرتبة تسمحلك ان تناسق بين الحركة و الفرة بسهولة بأرجاء الطوارئ وبين قيافتك و اناقتك كطبيب ، بالنسبة للفيميل الاظافر الطويلة والكعب العالي يعرقلن عملج، لاتنسى الختم والسماعة والباج وموبايلك مشحون وبيه رصيد و ارقام البيرمننت الي تحتاجهم ، اذا عندك pulse oximetry جيبه وياك مفيد جدا ، وبعض الاطباء الشطورين يجيبون وياهم تورچ و كم چكليته بالجيب.
اشترك معنا @MydoctorA96
٢- حاول تجي للكول من وكت او على الاقل لاتتأخر على الي قبلك ، شايف شلون تفرح من يجي اليلزم وراك من وقت ويأوفك ولو خمس دقايق قبل انتهاء واجبك؟ وشلون تضوج من يتأخر عليك ولو بخمس دقايق؟ خلي روحك بنفس الموقف والدنيا دوارة☺️
اشترك معنا @MydoctorA96
٣-لا تجي للكول وانت منهك او جوعان او نعسان ، حاول تتجنب ذني الامور قبل الكول وتتهيأ ، اكل زين و اخذ قسط من النوم والراحة قبل لاتجي، لان اذا وحده منهن صارت عندك راح تتحول الى مخلوق هلامي يتمشى في ارجاء المستشفى.
اشترك معنا @MydoctorA96
٤-من تمر من يم الاستعلامات والشرطة الموجودين سلم ولاتشيل خشمك ، اولا السلام بيه اجر وثواب وثانيا هذا راح يخليهم ياخذون عنك نظرة زينة وممكن هذا راح يجنبك هواي مشاكل .
اشترك معنا @MydoctorA96
٥- اي مكان جديد راح تداومه المفروض تجي تشوف الوضع قبل لا تداوم ، تشوف اللود و السياقات القانونية والادارية تتعلمهن من الطبيب المقيم الدوري او الاقدم الموجود هناك ، حاول تتعرف عالتحاليل المتوفرة والعلاجات الموجودة وسويلك تريننگ ولو مبسط.
اشترك معنا @MydoctorA96
٦- لمن تداوم بمكان حاول تتعرف عالممرضين الموجودين ، اعرف اسمائهم او كناهم ، اذا بيهم شخص اكبر منك سناً حاول تسميه بكنيته (ابو علي، ابو حسين ، وهكذا) ، هواي منهم قديمين و مارين عليهم العشرات قبلك ويعرفون منو الطبيب المحترم من الهزيل من الشاطر من اليسخت من المجد من المتواضع و المتكبر وممكن يعرقلون عملك او يخلقولك مشاكل ، او ممكن يخلون عملك يمشي بسهولة ، مو كلشي بيدهم بس انت واحد وهمه مجموعة خليهم اصدقائك وراح يمشي شغلك .
@MydoctorA96 اشترك معنا
٧- علاقتك وي الممرضين -الي هواي ما مستوعبين مفرداتها- خليها خد وعين ، لا تشيل خشمك عليهم و لا تصير وياهم دهن ودبس ، يعني سلم عليهم وسولف وياهم وتجاوب واضحك ضحكة بابتسامة و علق الهم بالفيسبوك بس لا تروح زايد بالشقة او تضحك بصوت عالي و تنسه روحك .
@MydoctorA96 اشترك معنا
٨- الممرضات خليك وياهن رسمي ، لاتتمضحك وياهن و لا تغندب بوجوههن ، وبالنسبة للفيميل ايضا اتبعي نفس القاعدة معكوسة ، خليج صديقة للممرضات و رسمية وي الممرضين .
@MydoctorA96 اشترك معنا
٩- اثناء العمل قدم/ي الدعم والتشجيع للستاف ، مثلا اذا الممرض سوه ECG و سحب ورقة التخطيط من الجهاز وانطاها الك ، الزم الورقة وگله عاشت ايدك ، وهكذا ، استعمل التشجيع لان همه بزعانه رواحهم ربما اكثر منك وهذا الكلام يولد عدهم الارتياح والنشاط ، المقصر لا تعيط بيه كدام المرضى او المرافقين ، حاول تقدملة النصيحة بطريقة لبقة و اذا شفته يسوي شي غلط گله هاي گبل جانت هيج اما هسه بالجديد آخر الدراسات تكول كذا و علمه ، اتبع هاي الطريقة بالاكبر منك سنا والاقدم منك بالمهنة مثل الصاير الهم ٥ او ١٠ سنوات بالصحة .
@MydoctorA96 اشترك معنا
١٠- اذا تنحرج من شي ماتعرفه كدام الممرض احچيلك كم مصطلح بالانكليزي وعبرها و اغلبه من هاي الناحية مثلا گله (بس هاي الا اذا complicated و تحتاج lab investigations و advanced approach لان بيها differential diagnosis )😳😳 ، و اذا سألك المريض او المرافقين سؤال ماتعرفه گله مانكدر انطيك حجايه لان يرادله بعد تحتاليل ماموجودة بالمستشفى و من هاي الترهيمات ، واذا المريض راقد بالمستشفى وكلش انحرجت فگلهم هاي بعد يم رأي الدكتور مالته هو المسؤول عنه ومتابع حالته، وكون تصير بارع بالهروب من المواقف المحرجة بس وراها لازم من ترجع تحاول تقره وتتعلم، ولو المفروض تعرف تجاوب من الاساس چا المن دكتور وخبصة😒
@MydoctorA96 اشترك معنا
١١- لا تگل لاي مريض ماعندك شي ماراح يقتنع بيك لأن هو جاي ومتعني للمستشفى على شغلة اباله تالي انت تگله مابيك شي!! ، حتى لو صدك شفته مابيه شي لاتگولها اله ، اسأله عن عمله اذا جان عمله شاق او عنده صعوبات بالبيت گله هاي الحالة تصير عندك بسبب الاجهاد والتعب -وحاول لا تچذب ههه- و اذا كاعد بالبيت گله هاي بسبب الكعدة المطولة بالبيت وخصوصا للنسوان ، وانطيه نصائح گله تجنب العصبية و العب رياضة وعوف التدخين ومن هذا الحجي هو راح يگلك اي والله دكتور صدك انه حالتي العصبية ما اسيطر عليها و وينها الرياضة يمعود ههه والتدخين مايعوفه لو توذن ، تحس نفسك هنا دكتور هاوس.
@MydoctorA96 اشترك معنا
١٢- لا توكف يم زميلتك الطبيبة وكفة مطولة وحدكم وكدام الناس وتسولفون حتى لو جانت سوالفكم عالعمل او مناقشة لكيس ، المجتمع -خصوصاً مجتمع الصحة- مريض و راح يتهمونك بانك زاحف والبنية يصير عليها حجي ، اطمئن حتى لو تعرف كلش زين ان نواياكم سليمة ١٠٠٪ ماراح تسلم من الكلام ، القصد هو الوكفة المطولة مو الوكفة العادية ، وهنا المشكلة لابيك ولا بزميلتك بل تجنبا لكلام
المجتمع المريض ، لابأس اذا جنتو ٣ نفرات او جنتو جالسين بمكان تواجدكم بالعمل .
@MydoctorA96 اشترك معنا
١٣- بنفس الوقت لاتصير صنم و وجهك احد من الموس و حتى سلام ماتسلم على زميلاتك ، خلي عندك علاقة طيبة وياهن واعتبرهن خواتك وعاملهن باحترام، اذا تقطع وياهن راح تتهم بانك قافل و متحجر و متكبر ، والفيميل هم خلي رجليج بالكاع 😅 تره ذوله زملائج واخوانج مو غربة ، والزاحف زحلكيه ولاتنطينه عين😑.
@MydoctorA96 اشترك معنا
١٤- احترم مسؤوليك و مدير المستشفى ورئيس الاطباء وخلي علاقتك بيهم زينة حتى لو جنت تشك بمستواهم العلمي و بمؤهلاتهم الادارية ، اولا هذا احترام من ضمن الاخلاق الطبية وثانيا هذا راح يمشيلك شغل وتمشي اجازاتك و نزلاتك وبقية امورك بسهولة وبطيب خاطر ، و ممكن تحصل كتب شكر و تندفع عنك عقوبات بسبب هذا الشي.
@MydoctorA96 اشترك معنا
١٥- اول ما تداوم وي عمك الاخصائي حاول تكسبه من البداية ، احترمه ولاتمشي كدامه و حضرلك جم سؤال من المواضيع اليحبها و حضر جوابهن ، حتى من يجاوب تناقشه وتتجاوب وياه وهنا راح يشوف انك تفتهم 😑، وتعال من وكت للتور و اكتب تور مرتب ومنظم وبخط واضح و غير شويه من نمطه لاتسويه تور اعتيادي -حتى لو باول اسبوع- مثلا بدل ما تكتبconscious اكتب بمكانها GCS =15 , وبدل من ان تكتب oriented اكتب Oriented to time , place, and person ، ماكو فرق جبير بالمعنى بس هاي الشغلات تخلي عمك منبهر بيك وراح ياخذ عنك نظرة زينة وبعدين حتى لو صدر منك تقصير او تأخرت او كذا راح يعذرك لان يدري بيك طبيب مميز وشطور (وكلاوجي ههه) ، ولو بعض العمام مايقرون التور بس ميخالف.
@MydoctorA96 اشترك معنا
١٦- الطوارئ جسر ومعبر وليس مقر للرقود ، يعني الحالات الكرتكال اما تدخل للانعاش او للردهة او تتحول لغير مستشفى ، وماسواها حالات بسيطة علاجها مو بالطوارئ (بعدين نحجي شتسويلهن)، لذلك خلي ابالك ان الطوارئ هي مفترق طرق وحاول تفرغها قدر الإمكان، فانت شغلتك تميز ياهي كرتكال و ياهي تحتاج تدخل فوري والباقي بالريش.
@MydoctorA96 اشترك معنا
١٧- النسبة الاكبر من الحالات التجي للطوارئ هي مو طارئة ، لذلك انت عليك اولا ان تتأكد ان هاي مو طارئة والخطوة الثانية شلون تزحلكهم خارج الطوارئ ، قسم حولهم عالاستشارية اذا الصبح مفتوحة گللهم (هناك الاخصائي خل يشوفه) و اذا العصر گلهم روحوا للعيادة افضل-و قسم اكتبلهم علاج من بره -ومجتمعنا يعشق العلاج الي خارج المستشفى - يروحون ياخذونه من اي صيدلية ويستمر المريض عليه بالبيت ، و اذا عنده الم انطيه مسكن الالام المناسب و زحلكه ، بس قبل لا تزحلك اي واحد مو تعوفهم كلهم بدون علاج ، حلل خبزتك بابره او اي تداخل يحسس المريض بالاهمية ، وبعض الحالات ماتحتاج اي علاج بس مجرد تدعبلهم عالاخصائي وتكلهم هذا يحتاج بعد تحاليل وفحوصات ماموجودة هنا بالطوارئ تلكونها هناك .
@MydoctorA96 اشترك معنا
١٨- رحمة لوالديك حاول ان تبتعد من اعطاء الانتيبايوتك بالطوارئ لان ماراح يسكن المه ولا يقلب المعادلة، ومريضنا ياخذ جرعة وحده ويطفر تالي يصير resistance ، لا تنطي الانتيبايوتك الا اذا شفته راح يستمر عليه من يدخل المستشفى او ان الانتيبايوتك ضروري جدا مثل التهاب السحايا البكتيري او تسمم الدم او الحالات الجراحية الي راح تدخل عمليات تمهيدا للعملية ، ما سواها لاتنطي رحمة لاهلك ، و اذا شفته يحتاج انتيبايوتك اكتبله من بره حتى ياخذه ويستمر عليه .
@MydoctorA96 اشترك معنا
١٩- لمن يجونك مجموعة مرافقين تي أم و خابصين الدنيا طشرهم و لاتخليهم متجمعين وخابصين الدنيا؛ دز واحد عالتحاليل و واحد عالعلاج و واحد على علاج من بره و واحد كله ابقه يمه لايصير عنده شي و واحد گله دلك رجلين المريض وهكذا اشغلهم بنفسهم ، اذا شفت نسوان خابصات الدنيا گلهن بدل ما تصيحن ادعن للمريض رب العالمين هو المشافي واذا تخلي زلمتهم الجبير يطلعهن بعد احسن .
@MydoctorA96 اشترك معنا
٢٠- لمن تشوف مجموعة جايينك حامين ومريضهم تعبان حاول تطلع نفسك بريء بطريقة ذكية ، لان حتى لو جنت انت مامقصر فربما ينقلب الموقف عليك ، شتسوي ؟ حاول ان تكون انت المحرك الهم والدافع مو همه اليدفعونك نحو المريض ،انت هاجم قبل الآخرين، شلون؟ دخل بعض الكلمات بحچيك يعني من تدز واحد عالتحاليل گله (هاك هاي ورقة التحليل وديها للمختبر بسرعة) وهنا كلمة (بسرعة ) كلمة ذهبية ، من تدز واحد للعلاج كله استعجل لا تتأخر ، بهاي الحالة راح يشوفون انك انت المحرك والمستعجل ويتفاعلون وياك رغم انك ماسويت شي بس مجرد كلمة دخلتها بحچيك !
@MydoctorA96 اشترك معنا
٢١- تكدر تطلع بعض من المواقف الساخنة بحچاية ، مجموعة جايبين مريض تعبان ومن تسألهم (شوكت صارت عنده هاي الحالة) اذا جاوبوك (صارله يوم) او (صارله اربع ساعات) جاوبهم (چا وين چنتو ) (ليش متأخرين هيج؟!) اذا صار شي عالمريض فهاي الحجايات راح تخليهم يلومون انفسهم بانهم السبب لان تأخروا و ما ينگلب الموقف ضدك، وخلي كلماتك لطيفة وصار وتدلل ومن عيوني ، المواطن يفش بهاي الكلمات.
@MydoctorA96 اشترك معنا
٢٢- اذا شفت مجموعة هائلة جاية وي مريض تعبان جدا ويريد يموت او شفته ميت ، اطلب من چبيرهم ، ان يطلع جماعته من الردهة لان عدنا شغل والمريض تعبان وسربله خبر بالوفاة بحرفية.
@MydoctorA96 اشترك معنا
٢٣- لازم تعرف شلون تسوق خبر الوفاة ، حاول لا تستعجل بيه ، افحص وچيك وحط الديسي وشوف الرذم ، وخلي سماعتك عالهارت ، وحاول ان تخلي اخبارك الهم بطريقة تسلسلية ؛ يعني المريض التشوفه گاسبنگ گلهم وضعه كلش صعب ويم رب العالمين ، وراها گلهم وضعيته حيل تعبانة و الامل بيه ضعيف ، تكدر تگلهم دماغه و الرئتين تعطلن ، تالي تگلهم البقية بحياتكم و الله يصبركم ان شاء الله والعوض على رب العالمين احنا حاولنا وياه لآخر نفس بس هذا امر الله ، ومن هذا الحجي، وتعود دائما ان تحجي وي واحد مو وي المجموع ، وي كبيرهم الذي علمهم السحر.
@MydoctorA96 اشترك معنا
٢٤- اي مريض كرتكال لاتنطي للاهل امل ، ومن تكون محتار بالجواب گلهم مريضكم بعده تعبان و مامتجاوز مرحلة الخطر و ادعوله .
@MydoctorA96 اشترك معنا
٢٥- لمن تخابر عمك الاقدم او الاخصائي لا تخابره كدام المريض او الرلتف ، لان راح تقل ثقتهم وقناعتهم بيك ، شوفلك مكان مناسب وخابر ، و من تخابر بوقت متأخر من الليل افتتح المكالمة (مرحبا عمو آسفين عالازعاج الوقت متأخر ) واقراله المقتل.
@MydoctorA96 اشترك معنا
٢٦- لا تحجي وي المريض او المرافقين بطريقة مهزوزة او مرتبكة ، احجي بكل ثقة حتى لو كانت قناعتك بكلامك مو تامة ، وهذا السر بقناعة هواي من المرضى والمرافقين بكلام الممرضين والمضمدين لانهم يذبون كلامهم بطريقة لبقة تخلي المقابل يقتنع .
@MydoctorA96 اشترك معنا
٢٧- اي حادث مروري يجيك او اي حالة تحس بيها قضية جنائية (محاولة انتحار ، حرق ، تسمم دوائي ، مشاجرة ، سقوط من شاهق ، طعنة سكين ، او طلق ناري ، او لاعب مصاب بالمباراة او كذا) اكتب مشاهداتك واختم عليها .
@MydoctorA96 اشترك معنا
٢٨- حاول توثق اي اكشن تسويه ، واذا انت بالطابق وصاحوك على مريض ، اي شي تشوفه عنده كتبه واكتب بيا وقت حتى تطلع من المؤاخذات اذا صار اي شي عالمريض فيما بعد.
@MydoctorA96 اشترك معنا
٢٩- مثل ما تسمع هواي ، لا تحكم على اي كيس انها HYS مباشرة ، هاي السالفة dx of exclusion ، ورحمة لقبيس احترم الchest pain .
@MydoctorA96 اشترك معنا
٣٠- اي مريض يجيك فاقد الوعي دائما سويله ABC بسرعة و اسحبله تحاليل بالذات للسكر ، و اذا يمك جهاز قياس السكر شوفه بيه ، و اذا المريض عنده سكر وياخذ انسولين او شكيت اي شك انه هايبوگلايسيميا انطي هايبرتونك عمياوي حتى بدون ما تعرف شكد سكره ، و اي مريض يجيك ما تعرف شعنده ولا الهستري مالته لا تحتار ، سويله ABCDE و دزه تحاليل و ربك يسهل.
@MydoctorA96 اشترك معنا
٣١- معضلة المعضلات هي شلون تقنع المريض او الرلتف انه مايحتاج مغذي؟ كله ضغطه زين ما يحتاج مغذي بس ننطيه يصعد ضغطه، اضمنلك راح يسكت .
@MydoctorA96 اشترك معنا
٣٢- اهم مهارتين بالطوارئ لازم تتعلمهن زين و ابداً ما تخطأ بيهن هنه CPR و ABCDE ، اكبر خطأ ممكن ترتكبه بحياتك اذا ما عرفتهن، والاقامة الدورية هي الفترة الذهبية التتعلم بيها هواي اشياء ماتتعلمها بغير مكان وربما محد يعلمك بيها بعدين خصوصا الlife-saving مثل CV line و Endotracheal tube و chest tube و خياطة الجروح ، وزحمة تروح تدرج بمنطقة نائية وانت ماتعرفهن.
@MydoctorA96 اشترك معنا
٣٣- حاول ان تقرأ بصورة مستمرة وتطلع عالكيسات الي تواجهك و اسأل عمامك و لاحظ الكيسات وشنو طرق العلاج الفعالة و المناسبة ومو عيب ما تعرف وتسأل انما العيب اذا ماتعرف وتستمر ماتعرف او تستمر تشتغل غلط.
@MydoctorA96 اشترك معنا
٣٤- نصب بجهازك برنامج medscape حتى تطلع عالادوية بصورة سريعة اذا تحتاج تعرف عنها شي غامض عندك ، كذلك يفيدك بهواي امور علمية.
@MydoctorA96 اشترك معنا
٣٥- قبل لا تنطي دم للمريض شوف فصيلة المريض وطابقها وي المكتوب عالبطل ، تأكد من الاكسباير مالته و تابع المريض لا يصير عنده تحسس.
@MydoctorA96 اشترك معنا
٣٦- دائما اسأل عن الحساسية الدوائية لمن تنطي العلاج بالذات البنسلين ، و دائما اسأل عن الربو والقرحة لمن تنطي NSAIDs .
@MydoctorA96 اشترك معنا
٣٧- عود نفسك دائما ان تكون سستماتك و تسأل اسئلة هادفة بالهستري وتفحص بطريقة احترافية ، بمرور الوقت راح تصير عندك (شمرة) -مو صرع ههه- تبقه وياك طول عمرك وتظل تمشي عليها تلقائيا ، فابدي بطريقة صحيحة حتى بعدين تصير عندك خبرة تختصر بيها الوقت و ملكة بالسؤال والفحص تلكف الكيسات بيها.
@MydoctorA96 اشترك معنا
٣٨- لا تنطي رقمك او رقم اي واحد من اللاطباء للمريض ولا للرلتف ، راح تفتح عليك باب بس تسده يعتبرونك موزين و متكبر و ماتجاوب عالمكالمات .
@MydoctorA96 اشترك معنا
٣٩- حاول تتعلم من كل الفروع التداوم بيها و مو تقفل على البرانج التريد تروحله بعدين ، حتى تصير ملم وطبيب اخصائي ناجح فيما بعد ، اذا قفلت على برانج محدد راح تبدي تهمل البقية ويصير شغلك بيهن متلكئ.
@MydoctorA96 اشترك معنا
٤٠- تذكر دائما مهما مرت بيك المآسي ان الكول والاقامة الدورية راح تخلص و تصير اخصائي و لا تتضجور من دوامك وماكو اجمل من دعاء عجوز الك ولا اروع من لذة انقاذ انسان شارف على الموت وان عملك بعين الله و لاتحاول ترضي احد على حساب رب العالمين .
@MydoctorA96 اشترك معنا
قواعد الاقامه الدوريه الاربعون 👆
@MydoctorA96 اشترك معنا
ليست هناك تعليقات:
إرسال تعليق